訓醒覺沖多次按摩浴~ 爽! 煮左D煎蛋煙肉做早餐，D蛋好有蛋味呀!
10點左右Check out就行一陣Greymouth,
明明好好天，一D雲都無, 另一邊就見到山邊倒霧!好神奇ge感覺!
今日要去冰川, 之前爬文果陣已經話山區油費會貴d, 所以入滿油先出發! 第一次自己入油, 原來支油槍要咁樣扣法先入到油!
中途站Hokitika Gorge, West Coast人口中ge Blue Pool!!!
由於地點都幾偏僻, 行ge都係鄉郊路, 開快少少(30km)後面架車就會食塵
由Greymouth去到Hokitika Gorge大概2個鐘，泊好車之後行一小段路就會見到WOW一聲的Blue Pool!
藍到好似寶石咁! 雖然有好多人, 但全部都係型男索女，輪住由石頂跳水!
今日成30度，我都好想落水呀! 不過無準備
浸下腳算了
不過大家小心，呢度有D小黑蚊!
之後就去左Hokitika Town Centre 食Lunch，
本身Mark好左去食Fat PiPi Pizza，但原來無開! 見到去襯搵佢GE都係亞洲人! 大家都係爬同一篇文章~XD
於是我o地就去左對面果間Stella Cafe，大約2點條街無乜車無乜人，坐o係街邊食好悠悠閒~
叫左個Egg Benedict with Salmon、Fish and chips同兩杯野飲，
個Fish & Chips 勁。大。碟!
呢舊朱古力三十度之下會溶，之後二十度又硬返，好好玩，又好食！
之後行下街，有勁多間藥房同首飾鋪! 果然係旅遊區，不過無乜人XD
買左D玉石孝敬家中長輩! 呢度D石愈黑就愈貴，唔似中國人鐘意翡翠玉色，所以呢D色就相對上平D，不過我唔識睇玉，所以都唔知好唔好，望落好睇就算
Hokitika ge 重點就係佢個海灘! 真係又大又靚! 加上好好天~ 係我地呢個Trip去過最靚ge （石）沙灘!
上面有好多"藝術品" 影下相都幾好玩~
跟住去到Fox Glacier都差唔多5點，Check-in左Top 10 Holiday Park之後，
就趕去Lake Matheson，見到Matheson Cafe無乜人! 於是就先去食Dinner~
頭圍用膳XD 不過食完6點幾就開始要等位Lu，
Whitebait Salad NZ$18 (好貴，但好好食)
網上推薦的Beef Ribeye NZ$36 (一般，未入到好食的名單)
Merino Lamb Leg NZ$35 (入口即溶! 超級tender! NZ的羊亦唔會有好大陣騷味~)
最後再叫左個Matheson Ice Cream~ 好圓滿
P.S. 食食下D大陸團成班人黎借廁所，之後蹲O係我地前面玻璃外ge平台，大殺風景
跟住天仲未黑，可以行去Lake Matheson，一路行都無乜人，好驚會好快天黑，迷路於深山中XD 不過夏天去NZ就有呢個好處，9點幾先天黑!
都行左半個幾一個鐘... 行到去Main View Points 就有好多人啦~ 大家都等D雲散開可以影到個山頂，同無風時平靜GE湖面可以見到倒影，
超級靚! 不過太多相機友霸住D位等影日落，所以都幾難影相~
之後行多半個幾鐘就出返去啦~ 見到好大個咸蛋王! 好靚!
今晚住ge Top 10 Holiday Park，因為得返5人房，好奢侈! 不過又係無冷氣，三十幾度要開窗訓覺，又怕有小偷，要攬住財物訓
門口就有繡球花
聽日一早就上冰川！ 好。緊。張！！
留言列表
