今朝起身落雨粉，天陰陰。
Hostel早餐食粟米片，呢隻好好食!
今日第一站去Castle Hill/Kura Tawhiti Conservation Area(怪石保護區)， The Chronicles of Narnia: The Lion, the Witch and the Wardrobe 都o係度拍攝。不用入場費，有空地停車場不用泊車費。車程約兩小時，雖然天陰陰，但無乜車、又開揚，沿路風景好靚~!
去到山區太陽伯伯出黎啦! 
泊左車之後指示好清晰，沿住條好空曠o既路入去就係。去到分叉路會見到Quantum field & Spittle Hill 兩條路，我地見到Quantum field d石大粒d就跟住前面d人行上去，d路都幾斜，唔知呢個地區係咪成日都會好曬，地下果D沙同草都好乾，有d路都幾冼，要小心d行!
呢度爬下、果度跳下，唔經唔覺都玩左2個鐘，而且超曬，有三十幾度! 熱死左
地方好大，建議可以去d少人d o既位置影相，發掘下怪石陣o既唔同角度，試下盪失下路LOL
本身諗住呢度野餐，最後都放棄左，因。為。太。曬!!!! 跟住渣左約1小時車去Arthur's Pass，差唔多2點先食Lunch，食完就去行山消化下~ 搵左一輪問埋i先見到Devil's Punchbowl o既入口! 原來o係條村o既最尾位置右手邊有條隱秘o既路! 呢度仲有CARPARK，早知渣車過黎啦~ 呢度有好多條山路可以行, 鐘意行山o既可以o係度住返晚! 今日三十幾度真係好辛苦, 於是我o地揀左條易行d o既Devils Punchbowl Waterfall~行左半個鐘左右就到，d水好清涼! 感覺好似去左香港梧桐寨~
5點左右去到今晚住o既市叫Greymouth，住Coleraine Motel，Check-in果陣個伯伯超好傾，見到我地對戒指咁閃就問我o地係咪honeymoon，跟住自動upgrade間spa room比我地! 有Jacuzzi架! 跟住又介紹我地周圍o既景點，又介紹最出名o既餐廳比我o地，又知我o地今日仲有行程要去Pancake Rocks叫我地快d去~ 仲拎左支奶比我地~ (P.S. 原來NZ每間MOTEL都會包一支奶比你朝早沖咖啡飲，佢會問你BLUE OR GREEN MILK，BLUE=Pure Milk, GREEN=Skim Milk，你去超市就明白點解咁樣分~)
於是快快放低行李之後，我o地就趕去Pancake Rocks- Paparoa National Park，去到見到無乜人，就知唔o岩時間啦.... 因為漲潮o既時候，呢度有個超~~自然o既現象，就係 Blowholes (天然噴泉)。不過清靜下都好，可以慢慢睇一層層o既疊石，不過有個上海黎o既細路好煩，係咁跟住我o地傾計，我諗佢阿爸阿媽都頂佢唔順由得佢同陌生人傾好過煩自己 
呢d海草叫Mermaids' Hair，真係好似有個頭浸住.....
NZ好多地方都唔比玩Drone
跟住返Greymouth Countdown買野食，有新鮮青口賣!! 識得郁架~~ 於是諗住買返粒蒜頭黎煮之際，發現超級貴蒜頭 HK$160/KG -MADE IN NEW ZEALAND! 同HK$20/5粒-MADE IN CHINA，如果比你你會揀邊種?
最後買左MADE IN NEW ZEALND大大粒的~夠用我成個TRIP用~食落比較綿同濃味~NZ$2.48/粒
呢隻醬煮新鮮意粉超好味! 我以後都去雪櫃搵意粉唔去雜糧櫃搵乾意粉啦~~~
留言列表
