第7週
第4週左右已經屋企用驗孕棒收到好消息!，不過疫情關係，安排第7週先去睇私家醫生拎懷孕証明書。朋友話過左第6週，可以順便去產科醫生度照閃閃，慳返幾百蚊診所驗尿費! 家人介紹去左睇王紹宏醫生，超到閃閃，好神奇，不過BB仲係一粒野，無乜野睇。拎左D 惠氏SAMPLE同鈣片，就檢查完。
第10週
之後用HA GO APP個預約通約政府醫院o既產檢，2日後就有人打黎通知檢查日期，第10週檢查，婦產科得十幾廿個人左右，去到驗尿、度高、鎊重、量血壓，同幾個準媽媽入房見姑娘，姑娘會講解一次成個懷孕過程，要做乜檢查等等。之後會再續個見面，睇下有咩問題咁，同埋會問埋會唔會出去私家度做T21/NIPTY唐氏檢查，出面做會99%準確，如果出私家做，佢公立醫院就唔會幫你做。我好蠢咁講左會出去做，咁就蝕左一次照超聲波見BBo既機會啦。
最後抽埋血，佢見我血壓有D高,13x-14x，就幫我抽多2支血驗個腎果D有無問題。約埋下次產檢就走得。
第12週
去左威爾斯醫院做妊娠毒血症同T21檢查，總共$7600，另外有文章會寫。
第13週
公立醫院產檢，都係驗尿、度高、鎊重、量血壓，今次婦產科有好多人，有成30人以上，仲有D婆婆黎睇婦科! 好快就叫左入房見醫生，醫生聽左BB心跳，就約埋第24週驗妊娠糖尿病日期，吩咐果朝唔好食野只可以飲清水，仲叫我要自己去私家度照結構，照完拎個份REPORT返公立醫院。之後去Counter預約日期，佢話下次第21週產檢去母嬰健康院就得。一個鐘唔夠就走得，蝕左一次超聲波呀....
第21週
去返私家王紹宏醫生度照結構，兩個月前已BOOK定。照咗十五分鐘左右，BB同胎盤都一切正常，只係子宮位置好似有個影，可能係纖維瘤，佢喺份report上面寫咗，大約1.5cm大，但佢無再咩，應該無咩問題呱。
第21週最後一日
第一次去母嬰健康院，都係驗尿、鎊重、量血壓。見姑娘，檢查左BB心跳正常，我對腳無水腫。因為T21係o係威爾斯做，姑娘中央電腦睇到份report正常。另外我帶左份照結構REPORT比姑娘睇，佢發現到寫住有個纖維瘤，所以今日要再去見醫生檢查下。然後我問左姑娘關於百日咳針幾時打，我同佢講我應該32週會離開香港，佢就話32週前應該打左。然後我又問bb打針o既野，因為會o係英國果邊坐月，加埋隔離大概兩個月時間先會返香港，咁頭兩個月bb d針(e.g.卡介苗、乙型肝炎第一針)都會miss左，姑娘話英國返黎果d好似都有得打卡介苗，只要同果邊講會返香港，佢有機會會同我打；而其他針，私家有d叫六合一o既針，係包埋乙型肝炎o既，所以唔怕miss左。之後等左半個鐘左右，終於見到醫生，醫生都係問返私家果邊講左乜，再量下我個肚size、聽多次bb心跳，之後就安排我2日後返去聯合醫院睇......因為母嬰健康院呢度無照聲波儀器，希望唔會有咩問題吧~最後拎埋Materna(6週份量)。
第22週
聯合醫院，驗尿、鎊重、量血壓。等左差唔多一小時，終於見到醫生，以為會有超聲波照見下BB，點知醫生都係聽心跳、度肚圍。跟住就同我講好多人都有呢D纖維瘤，好多時都有好多粒，我呢粒得1.5cm好細，可能係因為懷孕谷血而出黎，生完可能會無左，粒纖維瘤個位置唔係好影響到BB，所以唔洗膽心.... 之後又幫我約返下個月返嬰健康院睇。
第24週
聯合醫院，飲糖水。晨早8點幾就去到，先抽血，之後飲一杯滿嘅糖水，暖嘅，其實杯糖水都幾難飲，飲到我喉嚨痛😂慢慢飲，就唔怕嘔，因為嘔返出嚟係要第二日再飲過，好慘！之後要等2個鐘再返嚟抽第二次血。
第26週
母嬰健康院, 無啦啦同我打左百日咳針，正，唔洗等。姑娘話我個肚SIZE正常，但整體個人只係重得3KG，淨係肥O係個B度，可以食返多D紅肉同綠葉菜。又派左Materna。打完百日咳手臂好痺, 舉起手好似肌肉酸軟咁，但訓覺又要向果邊訓，壓住好痛，訓得唔好。
第26週
婦健, 註冊護士照4D超聲波。因為上次做完4D結構，之後REPORT面有張紙仔話做優惠，註冊護士26週起做一次照4D超聲波$880，我地都係想見下BB，所以就只做呢個當產檢，唔做醫生照普通超聲波+產檢$1200。護士話今日係黎影靚相，原來BB已經調左頭!! 不過佢塊面貼實個胎盤，攪到D相怪怪地，跟住叫我地出去去個廁所，等一陣再照，但BB都仲係咁.. 淨係踢下手腳算.... 之後護士收工... 就將轉左我去返王醫生果邊度照，王醫生好大力咁篤我個肚想BB郁下... 有少少痛，但BB都係唔聽話，最後影出黎D相仲唔靚過上次結構果張~ 無計，真係要BB合作先得~$880照左3次... 好抵, 不過好攰.....哈
第30週
母嬰健康院, 今個月重左3KG!!!! 係等於之前26WEEKS加埋重o既咁多! 唔怪之得今個月特別攰啦! 今個星期開始起身果陣會底褲前面三角位痛，姑娘話係恥骨痛，正常後期都會有，要做下D產前運動。另外胎動都開始好多，有時仲會比佢打到痛! 夜晚都會成日醒，一黎成日要去廁所，二黎比佢打醒，得閒要訓下晏覺先得，唔夠訓個人好炆、好抑鬱。產檢完左之後，通知姑娘會離港生仔，就無再約下一次BOOKING，拎返張橙卡留念就走得。
第30週
婦健, 王醫生普通超聲波+產檢+飛行證明
留言列表
